BUTUAN CITY – Gitay-og og talagsaong magnitude 4.8 nga linog ang mga syudad sa New York ingon man sa New Jersey sa USA kagabie, kansa ninglungtad og 15 ngadto sa 20 segundos.
Sumala sa tala US Geological Survey nga ang epicenter sa maong linog kay sa Lebanon, New Jersey, 64km kasadpang bahin sa New York City. Dugang sa maong ahensya nga dunay giladmong 4.7 kilometers ang maong pagtay-og. Alayon niini, grounded na ang flight sa JFK Airport sa New York ingon man sa Newark International sa New Jersey.
Gidasig usab ni New York Mayor Eric Adams ang mga tawo sa New York City nga mopadayon lamang sa ilahang adlaw nga normal tungod kay ginagmay nalang man nga mga aftershocks ang gilaumang mosunod sa maong linog. Dugang niini nga gipaniguro na usab sa mga first responders ang kaluwasan sa mga katawhan sa nahisgutang syudad.
Kahibaloan nga naidto pang November 30, 1783 katapusang nakasinati og magnitude 4.9 nga linog ang New York City.
