BUTUAN CITY – Padayon nga gipanubayan ang laing pagpamusil sa Bayugan City, Agusan del Sur nga mikutlo sa kinabuhi sa usa ka mag-uuma.
Natigayon ang pagpamusil-patay pasado alas 9:20 sa gabii sa Purok 6, Barangay Verdu, sa maong siyudad ning nakalabay nga gabii. Naila ang biktima nga si Ernie Arconada Azura, 45-anyos, residente usab sa maong dapit.
Sa inisyal nga imbestigasyon sa Bayugan Component City Police Station, angkas ang biktima sa motorsiklo nga gamaneho sa iyang higala nga si Sandy Bautista gikan sa Barangay Maygatasan sakop sa maong siyudad ug pag-abot sa lugar nga nahitaboan, duna matud pay mipara kanila og ila usab nga gihunongan sa pagtoo nga kini mosakay.
Apan sa ilang paghunong, deretso na niining gipusil ang biktima gamit ang wala pa matinong kalibre sa armas. Naigo ang biktima sa nagkadaiyang parte sa lawas og sa ulo hinungdan sa hinanali niining kamatayon.
Sumala sa drayber sa single motor nga si Sandy Bautista, usa lang ka suspek ang mihimo sa pagpusil apan wala siya maka-ila tungod kay naka-bonnet kini, naka-jacket og nakapantalon.
