BUTUAN CITY – Kasong homicide ang gi-atubang karun sa usa ka purok chairman human gipusil-patay ang nagmaoy nga hubog nga mitigbas kaniya ning nakalabay nga alas-10:30 sa gabii sa may Purok 5, Brgy. Cantapoy, lungsod sa Malimono, Surigao del Norte.
Naila ang biktimang mag-uuma nga si Ricky Enlasinto Tiempo, 51-anyos, residente sa maong barangay samtang ang suspetsado mao si Sherwin Pagaran Emiliano, Chairman sa Purok 5 sa maong barangay.
Sigon ni PSMSgt David Cenaro, imbestigador sa Malimono Police Station, impluwensyado sa ilimnong makahubog ang biktima nga nagmaoy matud pa atol sa usa ka anniversary party rason nga mi-apartar ang purok chairman ug gipapa-uli.
Apan mibalik kini bitbit na ang lagaraw dayong tigbas kang Emiliano sa bukton ug walang bahin sa iyang tiyan kinsa paspas usab nga mipadulong sa Malimono District Hospital.
Sa pagresponde na sa kapulisan nadiskubrehan nga gipusil-patay na ang biktima ug wala’y laing matumbok nga responsable tungod kay silang duha lang matud pa ang anaa sa crime scene. Gipasakaan og kaso ang purok chairman pinaagi sa inquest proceedings.
Samtang hustisya usab ang singgit sa pamilya sa biktima.
Sigon ni Merlie Tiempo, sister-in-law sa biktima, wala’y record ang biktima nga mupatay og tawo kinsa naglingaw-lingaw lang matud pa niadtong tungura human gibiyaan sa asawa rason nga mao na kini ang nagbuhi sa ilang mga anak.
