BUTUAN CITY – Dili na makasugat pa sa bag-ong tuig 2025 ang mag-inahan human parehong namatay dihang wala na makagawas pa gikan sa na-ugdaw nilang panimalay pasado ala-una sa kaadlawon kagahapon, Disyembre 30, sa Purok Nangka, Barangay Ilihan, Tabogon, Cebu.
Naila ang mga biktima nga sila Mylene Tul-id Lubanga, 33-anyos, ug ang iyang 7-anyos nga anak nga si Regil Kent.
Migawas sa imbestigasyon sa Tabogon Police Station, nga nakagawas na ang inahan gikan sa nasunog niining panimalay apan nibalik kini kay wala pa makagawas ang iyang anak ug tungod sa paspas nga pagkaylap sa kalayo, wala na sila makagawas pa hinungdan sa ilang pag-unong.
Nasayran nga nag-brownout niadtong higayuna rason nga nagdagkot og kanila ang inahan nga gitu-uhang maoy hinungdan sa sunog.
Wala sa maong pinuy-anan ang padre-de-pamilya tungod kay seaman kini ug wala pa’y eskedyol sa pagpa-uli.
