BUTUAN CITY- Gi-awhag ni French President Emmanuel Macron ang mga lider sa Europa nga magpakita og tinood nga gahum ug awtoridad taliwala sa nagpadayon nga hulga gikan sa China, Russia ug karon usab sa Estados Unidos.
Sumala pa ni Macron, andam na ang European Union nga molihok dili lamang isip usa ka ekonomikanhong pwersa apan ingon usab usa ka politikal ug panseguridad nga gahum nga makasukol sa mga internasyonal nga hagit.
Gipunting niini nga kini nga panawagan mao ang usa sa iyang ipasaka sa umalaabot nga EU Summit sa Brussels sa sunod nga mga adlaw, diin gilauman nga pagahisgutan ang mas lawom nga integrasyon ug koordinasyon sa mga miyembro nga nasud aron mapalig-on ang posisyon sa Europa sa global stage.
Ang maong pamahayag nagdala og mensahe nga ang Europa kinahanglan na nga molihok dili isip usa ka ginadumala nga rehiyon, kondili isip usa ka gahum nga makahatag og direksyon ug panalipod sa kaugalingon nga interes sa kalibutanong politika.
