BUTUAN CITY – Anaa na karun sa luwas nga kahimtang ang inahan lakip na ang iyang anak nga gihimugso niini sulod sa usa ka Comfort Room kon CR sa Saint Joseph Cathedral ning siyudad sa Butuan kagahapon sa hapon.
Sa eksklusibong pakighinabi ning sibyahan sa inahan nga si Jennelyn Undayon, dunay live-in partner ug kasamtangang nagpuyo sa Purok-7, Barangay Libertad ning siyudad, natulog lang siya sa simbahan mga alas 2:00 sa hapon sa dihang misakit ang iyang tiyan.
Nagtoo kining panuhot lang hinungdang misulod kini sa CR ug didto niya nahimugso ang iyang lalaking anak.
Maayo nalang kay nakabati ang guwardiya og hilak sa bata sulod sa CR hinungdang iya kining gisusi ug didto nakita ang inahan ug ang bata, nga daling gidala sa Butuan City Medical Center.
Gi-angkon usab sa inahan nga wala siya mipailalom sa Prenatal Check-up.
Hangtud sa pagkutlo ning balita, wala pa mibisita ang iyang kapuyo nga si Rey Llanos sa ospital rasong nagdepende nalang kini sa tabang gikan sa maloloy-ong indibidwal.
Sumala pa niini nga duna nay nagpahayag usab nga maoy mo-abaga sa balayronon sa ospital dungan sa pagpangayu ug tabang nga makapauli siya sa iyang pamilya sa may Santa. Ines sakop sa lungsod sa San Luiz, Agusan Del Sur.
