BUTUAN CITY – Giklaro ni Reynaldo Deita, ang chairman sa Libertad-wide Transport Cooperative kon LWTC nga nakabase sa Brgy Libertad ning siyudad sa Butuan nga ang wala o kaha dili pagsabot sa mga sakop sa Villa Kananga Transport Cooperative kon TRANSCOVIL, sa ipatuman untang dry run sa bag-ong tricycle route plan, ang hinungdan sa natigayong komosyon ning mi-aging adaw sa Purok Uno.
Sa eksklusibong pakighinabi sa Bombo Radyo Butuan, gipadayag ni Deita nga wala sila’y laing katuyuan uban sa taga-City Transportation and Traffic Management Department kon CTTMD kondili mao lang ang pagpahapsay sa biyahe sa route 2 ug sa entiro barangay.
Pinaagi unta matud pa sa dry run, masayran kung pila ka yunit sa motorized trisicad ang kulang ug kinahanglang idugang aron ma-accomodate ang tanang mga pasaherong musulod-gawas sa maong ruta ug labaw sa tanan, aron matagaan matud pa og prangkisa ang TRANSCOVIL.
Dugang pa ni Deita, nasayod nang daan ang mga TRANSCOVIL members sa himuong dry run tungod kay apil sila sa ilang group chat.
Ang ila matud pang ruta, daan nang nagtunhay ug kini ang prayuridad tungod sa gihuptan nilang prangkisa kondiin duha sa mga membro sa TRANSCOVIL ang nasulod niini aron ma-apil sa pito ka yunit nga tugutang makabiyahe.
Tungod sa na-apil nga duha ka membro sa TRANSCOVIL, gi-aplayan sa LWTC ang nasangpit nga ruta kansa wala gihimo sa grupo ni Richard Angao Jr, rason nga ang ilang aplikasyon ang gi-aprubahan.
