BUTUAN CITY – Gipa-ilalom na sa state of calamity ang mga lungsod sa Loreto ug Veruela sa lalawigan sa Agusan del Sur tungod sa lapad nga pagbaha nga hatud sa padayong mga pag-ulan tungod sa shearline.
Sigon ni Alexis Cabardo, information officer sa Agusan del Sur Provincial Disaster Risk Reduction and Management Office, kini human nga lapas na sa 15-porsiento sa ilang populasyon ang apektado sa mga pagbaha.
Padayon gihapon ang gihimong damage assessment sa mga local Disaster Risk Reduction and Management Offices kon DRRMOs aron masayran ang extent of damages nga hatud sa mga pagbaha nga halos lapas na sa tawo ilabina sa mga barangay nga duol lang sa Agusan River.
Sa pagkutlo niini nga balita, mi-abot na sa 6,560 ka mga pamilya ang apektado sa daut nga panahon kondiin kadaghanan sa mga namakwit, nanguli na sa ilang panimalay.
Sa pagkakaron, wala pa’y abiso kung mag-convene na ang ilang buhatan uban ang Sangguniang Panlalawigan aron irekomenda sa probinsyal nga kagamhanan nga ipa-ilalom na sa state of calamity ang ilang lalawigan.
Sa inisyal nga record, mi-abot na sa 94.9-milyunes pisos ang natalang damyos sa agrikultura ug impraktura ilabina sa mga lungsod nga anaa sa ikaduhang distrito sa maong lalawigan.
