BUTUAN CITY – Nagpatabang ning sibyahan si Joseph Borja, lumad nga taga-District 3, Brgy. Sacol, Buenavista, Agusan del Norte human nga gihingusgan karon sa barangay council ang pagtangtang sa iyang katungod nga mapanunod ang yuta nga nakuha sa iyang namatay nang inahan gikan sa Bagong Lipunan Improvement of Sites and Services kon BLISS project kaniadto ni kanhi First Lady Imelda Marcos.
Sigon ni Borja, nakalatid sa gihatag nga kasabutan sa iyang inahan gikan sa nasudnong kagamhanan nga kung mamatay na kini, siya ang mupanunod niini isip anak apan gibabagan kini sa ilang barangay council sa rasong dugay nang katu-igan nga wala na siya nagpuyo sa maong lugar. Aminado si Borja nga didto siya nagpuyo karon sa Cebu City tungod kay didto siya nakakita og trabaho human ang napulo ka tuig nga pagka-overseas Filipino worker.
Apan iyang ginegar nga sa maong lugar siya nagdako ug may iyang uli-an higayong mubakasyon siya gawas nga mipadayag na usab matud pa ang municipal assessor nga dili mahimong kuhaon sa barangay council ang iyang katungod sa maong yuta kansang balay nga ilang gitarukan, nasunog human ang pagkamatay sa iyang inahan.
Ang tipik sa reklamo ni Joseph Borja.
Samtang gikumpirma usab ni Brgy. Kagawad Marissa Vasquez, nga aprubado na ang ilang barangay resolution nga nag-disqualify kang Borja pagsunod sa maong yuta tungod kay talagsa ra kaayo kining mu-uli sa ilang lugar ug dili pa gyod magdugay. Gawas pa, makapamatuod niini ang dili niya pagka-botante sa ilang barangay.
