BUUAN CITY – Nagpadayon karon ang License to Own and Possess Firearms kon LTOPF registration caravan sa Regional Civil Security Unit kon RCSU-Caraga human kini gisugdan niadtong Oktubre ning mi-aging tuig 2020.
Sigon ni PMajor Nefre Acaso, OIC sa RCSU-Caraga sa eksklusibong pakighnabi sa Bombo Radyo Butuan, adtuon nila ang tanang mga police stations ning rehiyon alang sa ipahigayong LTOPF registration kondiin karon, senemana na nila kining himuon apil na kadtong mga lagyong kalungsuran.
Tumong niini nga mahatagan og higayon ang mga nanag-iya og armas nga maparehistro kini o kaha ma-renew ang ilang rehistro.
Gipasabot ni Major Acaso nga tungod sa nagtunhay karong pandemya, rason nga sila na mismo ang mu-adto sa kalungsuran kondiin ang ilang eskedyol sa usa ka lungsod, ipahibalo kini sa kapulisan pinaagi sa rekoreda.
Niadtong mi-aging buwan, ilang nahuman ang tanang mga lungsod sa Agusan del Norte ug karong adlawa, Huwebes, tibuok adlaw sila sa lungsod sa Bunawan, Agusan del Sur.
