BUTUAN CITY – Giklaro ni Joshua Salcedo-Salalac, hepe sa Regional Law Enforcement Unit sa Land Transportation Office kon LTO-Caraga nga duna pa’y natigayong ginukdanay tali sa iyang mga ka-ubanang nag-checkpoint ug driver sa City Transportation and Traffic Management Department kon CTTMD-Butuan adiser kini na-isyuhan og citation ticket.
Sa eksklusibong pakighinabi sa Bombo Radyo Butuan, gibutyag sa opisyal nga subay kini sa dili kolor pula nga brake light sa ilang service vehicle dihang kini gipara apan mipasutoy na hinuon pagpadagan, resulta sa ginukdanay. Dihang nasapon sa Langihan area, nagdumili pa paghatag sa iyang lisensya ang CTTMD driver ug gihulat pa nga ma-istorya sa naggukod kaniya ang iyang hepe nga si kanhi LTO-Caraga Director ug karon CTTMD head Ma. Kristina Cassion.
Giklaro ni Salalac nga gipamugos sa CTTMD nga wala nila gi-modify ang maong sakyanan apil na ang brake light pinaagi sa gipresenta nilang certificate gikan sa kompanyang gikuhaan nila sa maong sakyanan. Apan bisan unsa matud pa ang isulti sa taga-CTTMD, duna sila’y hulagway ug video nga makapakita nga dili kolor pula ang ilang brake light.
Bisan matud pa og gikonsidera nila ang protesta sa CTTMD apan wala makalingkawas ang ilang driver sa kalapsan niining ‘disregarding a traffic officer’.
Nagbahad usab si Salalac ngadto kang Cassion nga dili muhimo og lakang nga magtukmod na hinuon aron himuong personalan ang gihimo nila sa LTO ngadto sa CTTMD human gibungat ni Cassion nga panimalos lang matud pa ang ilang gihimo dihang gi-claman nila ang sakyanan sa regional director sa LTO rason nga gimando matud pa niini nga dakpon ang ilang mga sakyanan.
