BUTUAN CITY – Gideklarang Persona non grata sa Sangguniang Panlalawigan sa Surigao del Norte si Ma. Kristina Cassion, ang officer-in-charge kon OIC-regional director sa Land Transportation Franchising and Regulatory Board kon LTFRB-Caraga.
Sa gihimong sesyon kagahapong adlawa, na-aprubahan ang sugyot nga ideklarang persona non grata si Cassion tungod matud pa sa makadaut niining post sa iyang social media account nga naglatid sa ngil-ad nga batasan sa mga tawong misugat sa iyang mga sakop nga gisugo pagkuha sa mga estudyanteng Surigaonons nga na-stranded sa Mindanao State University kon MSU-Main campus sa Marawi City ug sa Iligan City.
Mahinumdumang ang wala pagsunod matud pa sa mga opisyal sa Surigao City sa nasabutang paka-unon ang mga LTFRB-Caraga personnel ug mga bus drivers nga nagsundo sa mga estudyante gawas sa kabastos pa sa gipakitang taras sa taga-City Disaster Risk Reduction and Management Office kon CDRRMO nga naninghag pa kanila dihang nanganaog ang hinungdan nga na-post sa opisyal ang iyang sentimiento.
Anaa pa ang pagpasa-pasa kanila sa ilang gusto untang kuhaong panihapon rason nga tungod sa kadugay sa paghatag og tukmang aksyon, nanguli sila sa Butuan nga wala’y panihapon taliwa sa kalawom na sa kagabhion.
Sa maong resolusyon nakalatid nga wala matud pa gisunod ni Cassion ang Code of Conduct and Ethical Standards for Public Officials and Employees nga nagmando kanilang mag-perform sa ilang katungdanan ngadto sa pinakataas nga degree sa excellence, pagka-professional, pagka-intelihente ug sa ilang skill.
