BUTUAN CITY – Sugdan na sa lokal na panggamhanan sa Butuan City sunod tuig ang rehabilitasyon sa Salvador Calo Supermarket sa may Langhihan kondiin punduhan kini og ₱100-M nga isip usa sa mga priority projects sa administrasyon ni Mayor Lawrence Lemuel “Law” Fortun.
Ang modernong merkado maghatag og bag-ong paglaum sa mga vendors ug mamalitay tungod kay daghang trabaho ang mamugna, mas mutaas ang kita, makadugang og buhis alang sa lokal nga panggamhanan ilabina nga mas nindot ug komportable na una kining palitan sama sa kasinatian sa usa ka mall.
Musuporta usab kini sa mga local producers, farmers, ug fisherfolk pinaagi sa mas organisado nga sistema sa pagbaligya, handling, ug storage sa mga produkto rason nga presko, limpyo, ug de-kalidad nga pagkaon ang masiguro alang sa mga konsumidor.
Gipaniguro sa City Economic and Business Development Department (CEBDD) nga padayon gihapon ang pagpamaligya sa mga vendors samtang nagpadayon ang konstruksyon aron dili maapektuhan ang ilang panginabuhian.
