BUTUAN CITY – Nahimong mas personal na ang imbestigasyon sa Senado kalabot sa Philippine Offshore Gaming Operators kon POGOs tungod sa pagpalawom pa nila sa personal nga kinabuhi ni dismissed Bamban, Tarlac Mayor Alice Guo kinsa mao si Guo Hua Ping sa tinuod nga kinabuhi.
Kini human nakasentro ang pagdungog sa Senate Committee on Women ngadto nila Guo ug sa gika-ingong iyang hinigugma nga si Sual, Pangasinan Mayor Liseldo “Dong” Calugay. Dihang gisulayan ang pag-establisar sa kutay sa duha , gipresenta ni panel head Sen. Risa Hontiveros ang impormasyong nag-suggest nga sila Guo ug Calugay, duna’y love child.
Base matud pa sa ilang nakuhang impormasyon, mismong si Calugay ang nagpa-ila sa mga tawo nga girlfriend niya si Guo Hua Ping. Gi-atubang ni Hontiveros ang executive assistant ni Calugay nga si Cheryl Medina ug gisultihan niini nga misulti kining duna’y anak sila Mayor Calugay ug Guo Hua Ping.
