BUTUAN CITY – Walay nakitang foul play ang kapulisan sa kamatayon sa usa ka retiradong government employee kansa nakaplagan nalang nga wala nay kinabuhi sulod sa usa ka apartelle ning siyudad sa Butuan kagahapon sa sayu sa gabii.
Sa pakighinabi ning sibyahan kang P/Sr. Insp.Paul Paden, Officer-in-charge sa Butuan City Police 1, gikumpirma niini nga bandang alas 6:00 sa gabii sa dihang nakaplagan sulod sa banyo sa apartelle nga nahimutang sa capitol road ning siyudad, ang patay’ng lawas sa biktimang si Bernabe Maglupay, 61-anyos nga taga Barangay Baan-km3.
Sa inisyal nga imbestigasyon, mga alauna sa hapon sa dihang misulod ang biktima sa maong apartelle kauban ang usa ka batan-ong babaye sakay sa usa ka single motor.
Tungod kay short time lang, gituktuk sa kadumalahan sa apartelle ang gisudlang kwarto sa biktima pipila ka oras ang nakalabay apan walay mitubag hinungdang ila nalang kining gi-ablihan ug nasuta didto sa banyo ang patay’ng lawas sa biktima samtang wala na ang iyang kauban niini.
Pagtoo pa sa otoridad, posibling nahadlok ang babaye rasong milakaw kini dayun.
Samtang base sa resulta sa SOCO ug Regional Crime Laboratory-13, walay foul play ang maong insedente diin gitoohang nasobraan lang sa kahinam ang lalaki rasong gi-atake kini sa sakit.
Gipaningkamutan usab sa sibyahan nga kuhaan ug pahayag ang pamilya sa biktima apan nagdumili kini sa pagpagawas. (Rolan Janea)
