BUTUAN CITY – Gihikay na ang kasong murder ug attempted murder batuk sa ulitawong construction worker nga mihatsa-patay sa usa ka lola samtang samaran usab ang laing usa pa kagahapon sa buntag sa may Purok 1-A Barangay San Juan, Surigao City.
Giila ang suspetsado nga si Joel Peroblanca Dalugdugan, 43 anyos samtang ang napatay nga biktima mao si Norma Ebon Mondero, 69 anyos nga balo samtang samaran usab ang iyang anak nga buntis nga si Emily Dean Morillon, 25 anyos nga dunay kapuyo ug anaa karun sa hospital.
Basi sa saysay ni Morillon ang anak sa napatay’ng biktima, nga naligo siya niadtong higayona ug maoy nadungog ang kusog nga singgit sa gawas.
Sa pagsilib niini, iyang nakita ang suspetsado nga nagdala ug improvised stainless nga hatsa ug gibugha ang ulo sa iyang inahan nga nag-inom ug kape samtang nag-ingkod sa kahoy nga lingkuranan.
Sa dihang nabati sa suspetsado ang iyang singgit, misulod kini sa ilang balay ug siya na usab ang gihatsa. Maayo nalang kay sa ikaduhang paghatsa sa suspek, nakalikay siya ug giluwas sa silingan nga si Isagani Troso Ecol.
Ang suspetsado nga miikyas nadakpan gilayon sa kapulisan.
Gipahayag sa suspek nga wala siya sa iyang kaugalingon sa dihang nahimo niya ang krimen tungod kay hubog kini ug dayong angkon nga migamit siya ug illegal nga druga.
