BUTUAN CITY – Pursigido ang lokal nga kagamhanan sa dakbayan sa Butuan nga suportahan ang claim sa mga local historians nga dinhi sa siyudad gihimo ang unang misa sa simbahang Katoliko sa Pilipinas ug dili sa Limasawa, Leyte nga maoy nakalatid sa atong nasudnong kasaysayan.
Gipadayag kini ni Fr. Joesilo Amalla dihang gisa-ulog kagahapong adlawa ang ika-504 nga kasumaran sa unang misa.
Sa eksklusibong pakighinabi sa Bombo Radyo Butuan, gipadayag sa local historian nga subli matud pang maghimo og position paper ang Butuan City government human nga wala gitunga sa mga midepensa sa karaang kasaysayan ang ilang gipatawag nga pagdungog alang sa maong claim.
Ang ila matud pang gikuptang mga dokumento gikan sa Espanya, pulos dapig sa claim sa Butuan tungod sa mga ebidensya niini sama sa lokasyon, paglatid sa mga pulong nga Mazaua diin gihimo ang misa ingon man ang presensya sa mga balangay boats nga dinhi lang sa siyudad makita ug dili sa Limasawa.
Misaad si Fr. Amalla nga dili hunungon ang iyang gipakigbisugan sulod sa 50 ka mga tuig niyang pagduki,-duki, ma-usab lang ang 99-porsientong sayop nga kasaysayan.
Gihingusgan niining dili angayang kahadlukan ang ihap sa mga tawong mibotar pabor sa sayop nga kasaysayan tungod kay dili matud pa sila makatingog sa gikuptan niyang mga kamatu-uran kansa rason nga wala, gitunga ang mga pagdungog alang niini nga kayutuan.
Giklaro pa ni Fr Amalla nga mideklara na matud pa ang Diocese of Butuan nga dinhi natigayon ang unang misa kansa sama usab matud pa sa gitu-uhan ni Jaime Cardinal Sin niadto pang tuig 1995. Ang mga obispo matud pa sa simbahang Katoliko nag-agad lang sa mga historians, rason nga dili niya atrasan ang iyang gibarugan nga claim bisan og mu-abot pa sa Korte Suprema.
