BUTUAN CITY – Gibarugan sa local historian ning dakbayan nga si Fr. Joesilo Amalla nga sa Mazaua kansa mao ang utlanan sa Brgy. Bancasi ug Brgy. Pinamanculan ning siyudad sa Butuan, gihimo ang pinaka-unang misa sa simbahang Katoliko sa tibook Pilipinas.
Sumala niini, gikuptan sa dakbayan ang tanang ebidensya nga makapamatuod nga sa Butuan gihimo ang maong misa ug dili sa Limasawa, Leyte.
Apil niini ang paglatid sa mga pulong nga Mazaua, ingon man Kalaga nga karon mao ang Caraga ingon man sa lugar nga Butuan sa personal nga tigtala sa kasaysaysan ni Ferdinand Magellan nga si Antonio Pigafetta, ngadto na sa mga karaang balangay boats, bulawan, mga libro ug uban pa, kansa nagpunting lag sa dakbayan sa Butuan.
Gibutyag ni Fr. Amalla nga subling magduso og position paper ang Butuan City government aron pagtul-id sa kasaysayan human nga wala gitunga sa mga midepensa sa karaang kasaysayan, ang ilang gipatawag nga pagdungog alang sa maong claim.
Sumala niini, sukad pa niadtung 1574, duna nay record nga makapamatood nga diri sa Butuan gihimo ang pinaka-unang Misa sa Pilipinas.
Dugang ni Fr. Amalla nga nautro lamang ang kasaysayan pag-abot na sa mga Amerkano sa nasod, diin halos tanang mugna sa mga Kastila, gihulipan sa American standards.
