BUTUAN CITY – Wala na maka-abot pang buhi sa ospital ang regular lineman sa Agusan del Norte Electric Cooperative, Inc. kon ANECO human nakuryentihan dihang ayuhon unta niini ang usa ka linya sa ilang electrical line nga nadaut tungod sa daut nga panahon.
Na-ila ang biktimang si Hilario Aguirre, minyo og residente sa Brgy. San Vicente ning siyudad sa Butuan.
Sigon ni Danny de la Cena, information officer sa ANECO, natandog matud pa ang tuhod sa biktima sa secondary line sa posteng iyang gikatkat kaganinang alas-9:45 sa buntag.
Wala mulagpot ang biktima tungod sa suot nga safety belt hinungdan nga didto kini nagbitay sa gikatkat niining poste.
Gidugang sa opisyal nga tungod kay nadisgrasya ang biktima sa oras nga tingtrabaho, madawat matud pa sa na-ilo niining pamilya ang mga benepisyong angay kanila. (Beth Ruiz)
