BUTUAN CITY – Gihulat na lang sa Provincial Health Office sa Agusan del Sur ang confirmatory test sa lima ka mga indibidwal nga natumbok nga mitambong sa derby sa Davao City human nagpositibo sa rapid anti body test.
Base sa impormasyon nga gipagawas sa maong buhatan pinaagi ni Jacqueline Frances Momville, ang provincial health officer II, nagpahigayon sila kauban ang City og MUnicipal Health Office ug ang Democrito O. Plaza Memorial Hospital og rapid anti body test niadtong Abril 24, 27, 28 ug 29 ngadto sa 85 ka indibidwal nga mitambong sa sabung didto sa Matina, Davao City niadtong bulan sa Marso.
Sa nasangpit nga ihap, lima ang nag-positibo apan kinahanglan pa kining kumpirmahon pinaagi sa pagpa-ila sa ilang swab samples sa RT-PCR Method.
Gihimo na karon ang patient profiling og contact tracing ug gipanawagan na lang sa opisyal ang katawhan sa probinsiya nga sundon ang guidelines nga gitakda sa mga local health authorities og local government units diin ang ilang suporta dakong tabang aron malikayan ang kaso sa covid-19 sa lalawigan.
Nasayran nga base sa DOH Caraga situational report no. 78 on COVID19, kagahapong adlawa, ang rehiyon duna gihapo’y tulo ka kumpirmadong kaso sa COVID-19 nga pulos gikan sa Butuan City.
Samtang misaka pa sa 42 ang suspect cases nga gilangkuban sa 7 gikan sa Agusan del Norte, duha sa Cabadbaran City, 24 sa Butuan City, duha sa Bayugan City, duha sa Agusan del Sur, tag-usa sa Surigao del Norte, Surigao Del Sur ug Bislig City ug duha pa Tandag City.
