BUTUAN CITY- Nakit-an na ang lima sa 20 ka mga tripolante sa barge nga LCT Great Ocean samtang 3 ang gikatahong patay kansa napadpad sa baybayon sa Brgy. Cantapoy, lungsod sa Malimono Surigao del Norte adtong nakalabay nga adlaw tungod sa daot nga panahon nga mugna ni Bagyong Bising.
Naila ang mga niini nga sila Rogel Polo usa ka Chief Mate, 40 anyos, taga Inabanga, Bohol; Arjie Macara, 31 anyos, taga Ilo-ilo, Talisay City; Jojie Villanueva, 23 anyos, taga Linao, Talisay; Felipe Queben Jr. usa ka Timonil, 37 anyos, taga Ol- Bago, Asturias, Cebu;ug Noli Labucay 24-anyos, taga Iligan City.
Madumdumang,gi-abandona sa 20 ka mga tripolante ang maong sakyanang pandagat dihang gihapak na kini sa mga dagkong balud hangtud nga napadpad sa baybayon sa nasangpit nga lugar.
Padayon pa usab ang search and rescue operations sa Philippine Coast Guard-Surigao del Norte sa LCT Cebu Great Ocean alang sa wala pa makita nga mga tripolante.
Gipanawagan usab ni Coast Guard Station Commander Elaine Pangilinan, ang tanang mga sakyanang pandagat sulod sa maong bisinidad ug kasikbit nga mga kadagatan nga lantaw-lantawon ang maong mga tripolante sa posibilidad nga ila kining mabangalan human gi-abandona ang maong barge sakay sa mga life crafts ug i-report gilayon sa ilang buhatan.
Nasayrang ang nasangpit nga barge gipanag-iyahan ni Harold Tan sa Inter-East Shipping and Lighterage Corporation nga magkargahan matud pa og nickel ore gikan sa minahan sa Tubay, Agusan del Norte.
