BUTUAN CITY – Nagmalampuson ang gilusad nga “Oplan Pagtugis” ug Oplan “Salikop” batuk sa founder sa Forex Rice Trading Group kinsa misibat sa Agusan del Sur human gipangita sa mga tawong iyang na-ilad ug naka-invest og libuan ka pesos ning mi-aging tuig.
Nadakpan pasado alas-3:30 kaganinang hapon sa Banker’s Village sa Brgy. Jaro, Iloilo City ang 29-anyos nga si Dimber Celis, minyo, residente sa Purok 14, Brgy. Bahbah, Prosperidad, Agusan del Sur.
Nasayrang ang joint operatives sa Criminal Investigation and Detection Group kon CIDG-Caraga, kapulisan sa Agusan del Sur ug Regional Intelligence Division-13 ang naka-aresto sa suspek pinaagi sa duha ka mga warrant of arrest sa kasong syndicated estafa nga gi-isyu ni Judge Fernando Fudalan Jr, acting presiding judge sa RTC, Branch 7 nga nakabase sa Bayugan City, Agusan del Sur kansa wala’y girekomendang pyansa.
Nasayrang si Dimber Celis mao ang lider ug founder sa FOREX ug ikatulo nga Most Wanted Person alang sa Manhunt Charlie sa regional level sa Police Regional Office kon PRO-13 ug ikapito nga Most Wanted Person sa Provincial Level sa Agusan del Sur kinsa nalambigit sa Ponzi Scheme investment scam sa Caraga Region ug Region 11.
