Lider sa Federal Tribal Group of the Philippines nga si Bae Lourdes Latraca Infante, nagbahad nga magbaha og dugo sa Surigao ugaling dili pagawason ang gidakop nilang kauban

BUTUAN CITY – Nagpagawas og usa ka video message si Bae Lourdes Latraca Infante, usa sa mga nangulo sa Federal Tribal Group of the Philippines diin nagbahad kini nga magbaha og dugo sa Surigao City human gidakop sa kapulisan ang usa sa ilang miyembro kagahapong adlawa.

Gimanduan usab niini ang mga establishmento nga magsirado na sulod sa 72 oras tungod kay mobaha og dugo sa Surigao ugaling dili pagawason ang ilang miyembro nga gidakop.

Gane, gipanawagan niini si Pangulong Ferdinand Marcos jr nga mokanaog sa Surigao og dalhon ang tanang puwersa tungod kay dili matud pa madutlan og sundang lakip na sa bala sa armas ang ilang mga tropa.