BUTUAN CITY – Magpahigayon og libreng operasyon alang sa mga bungi o nguho ang One Caraga Inc. ingon man sa Maharlika Charity Foundation Inc. karong Agusto 5 ning tuiga sa may Holy Child Colleges of Butuan Hospital.
Lakip sa dili na bayaran alang sa maong operasyon ang mga take-home nga mga tambal.
Sumala ni CK Kho, Presidente sa One Caraga Inc.,a modawat sila og pasyente nga dili taga-Butuan ug bugtong requirements lamang niini nga makaabot lamang sa nahisgutang venue.
Nasuta nga kini na ang ika-25 ka tuig ug ika 34 nga misyon sa pagpangopera sa maong mga foundations dinhi sa Butuan ug Caraga Region.
Sumala ni Kho, kasagaran sa mga nakasinati sa maong kaso kadtung mga bata nga anaa sa layung dapit nga kulang sa prenatal care ug kakulang sa nutrisyon.
Dugang ni Kho, walay angay ikahadlok ang mga ginikanan nga pa-operahan ang ilang mga anak arun mahatagan usab sila og hayag nga ugma.
Alayon niini mamahimo lamang nga magpalista pinaagi sa pag tawag o text sa numero nga 09463821333, o kaha magpalista lamang dinhi ning sibyahan.
