BUTUAN CITY – Magpahigayon og tinuig nga libreng digital rectal examination dinhi sa dakbayan sa Butuan karong Hunyo 21, Biernes, atol sa kasa-ulugan sa Father’s Day, ang National Association of Urologists in the Philippines.
Sa eksklusibong pakighinabi sa Bombo Radyo Butuan, gibutyag ni urologist Dr. Rodrigo Hipol III nga dungan sa pagsa-ulog sa ika-125 nga anibersaryo sa Independence Day, nanghinaut usab siya nga hingpit nang mahimong gawasnon ang kalalakin-an gikan sa sakit sa prostate ilabina sa prostate cancer.
Gibutyag ni Dr. Hipol nga kinahanglan gayod sa mga lalaki ang magpa-eksamin sa ilang rectum ilabina kadtong mga nag-edad og 35-anyos pataas samot na kung duna’y kaliwat nga naghambin o kaha namatay sa maong sakit.
Tulo ka mga serbisyo matud pa ang ilang ihatag gikan sa alas-otso sa buntag ngadto na sa alas-12 sa udto.
Giklaro ni Dr. Hipol nga duna’y libreng pamahaw sa mga sayong maka-abot sa venue samtang duna usa’y limitadong libreng ultra sound sa ureter, prostate, ug bladder ingon man ang pag-screen sa mga lalaking posibleng duna’y problema sa prostate.
