BUTUAN CITY – Gipahikling na sa pangamhanan sa Papua New Guinea ang anaa sa 7,900 ka mga residente duol sa Mount Mungalo sa Kaokalam village, probinsya sa Enga human nga padayon pa gihapon ang mga ginagmayng pag dahili sa yuta sa maong bukid, kini taliwala pa man nga kamulo pa og kalot ang mga residente sa nasangpit nga lugar sa yuta nga ning tabon sa kapin 2-mil ka mga tawo.
Sumala sa mga opisyal sa nasangpit nga probinsya nga nag pabilin gihapong aktibo ang maong bukid sa pagdahili sa mga yuta niini. Sigon sa United Nations nga lisod masuta ang insaktong ihap sa mga natabunan sanglit hangtud karon, nagpabilin pa man gihapong lisod ang dalan padulong sa maong lugar.
Sigon ni Niels Kraaier sa Unicef Papua New Guinea, dili na rescue mission ang ilahang ginahimo karon sa maong lugar, kundili recovery mission nalang sa mga nanga lubong tungod kay gituohan man niining wala, o kaha gamay ray naka survive sa maong landslide.
Kahinumdumang ningsaka na sa kapin 2-mil ka mga tawo ang gituohang nalubong nga buhi sa landslide sa maong lugar, diin sigon sa National Disaster Centre sa nasangpit nga nasod, naglisod pagkalot ang mga rescuers sa mga natabunan tungod kay kapin sa 10-metros man ang gibag-on sa yutang ning tabon sa mga niini, dugangan pa sa kalisod sa dalan paingon sa nasangpit nga bario.
