BUTUAN CITY – Wala na magduha-duha pa ang tulo ka mga batang lalaki nga i-turnover sa sibyahan sa Bombo Radyo Butuan, ang dakong kantidad sa kwartang ilang napalgan sa national highway sa Purok 11, Brgy. Bancasi ning siyudad sa Butuan.
Sigon ni Sharon Tutaan, ang tawong daling giduol sa mga batang sila Carl Anthony Eluza, 13-anyos; Jules Cedric Guduyo 12-anyos og Patrick Sanchez 11-anyos, parehong residente sa Purok 1 sa maong barangay, migawas ang mga bata gikan nagdula og computer games tungod sa brownout.
Dako na lamang ang ilang kakurat dihang sa ila na untang pagpa-uli, ilang napalgan ang tag-usa ka libo ka pesos nga kwartang papel nga gitu-uhang bag-ong withdraw pa lang tungod sa kabagtik pa niini.
Tungod sa kakulba, dali nilang giduol ang na-ila sa ilang lugar nga si Lolo Sharon Tutaan nga mao usa’y nagdala kanila dinhi sa Bombo Radyo Butuan, dayong panawagan nila sa mga nawad-an og kwarta nga mudalikyat lang ning sibyahan aron ma-claim kini.
Gibutyag ni Tutaan nga sa Bombo Radyo Butuan nila gipiling i-turnover ang nakit-ang kwarta tungod sa kadaghan sa mga tawong misalig niini gawas nga dali usab kining kadu-ulan sa mga tawong nanginahanglan. (Beth Ruiz)
