BUTUAN CITY – Gikalipay sa National Commission on Muslim Filipinos kon NCMF-Caraga ang pagdeklara ni Pangulong Rodrigo Duterte sa Marawi City nga gawasnon na gikan sa mga terotistang Maute-ISIS.
Sa eksklusibong pakighinabi ning sibyahan, gibutyag ni NCMF-Caraga regional director Faisal Mamintal nga daghang mga Maranaos ang nalipay sa pinaka-ulahing kalambuan ilabina sa pagkapatay sa tropa sa kagamhanan ngadto sa mga terrorist leaders nga sila Omar Maute og Isnilon Hapilon.
Aminado ang opisyal nga bisan og liberated na gikan sa mga terorista ang maong siyudad, dili pa gihapon makabalik sa ilang pinuy-anan ang mga apektadong residente tungod sa nagpadayong clearing operations sa mga sundalo.
Mala-umon siya nga sulod ning semanaha, ma-clear na ang maong siyudad aron makabalik na sa ilang tagsa-tagsa ka lugar ang mga residente.
Sa isyu usab sa pagbangon og rehabilitasyon sa Marawi, daghang isyu nga angayang tutukan ang nasudnong kagamhanan partikular na niini ang paghatag og panginabuhian sa mga bakwit nga nawad-an na sa ilang inadlaw nga pangita tungod sa damyos nga hatud sa giyera. (Beth Ruiz)
