BUTUAN CITY – Nagpagawas og lahar advisory ang Philippine Institute of Volcanology and Seismology kon PHIVOLCS tungod sa tropical storm Ada.
Sumala sa report, moigo ang bagyo sa sidlakang baybayon sa Southern Luzon gikan Enero 16 hangtod 17, nga magdala og kusog hangtod grabe nga ulan nga moabot og 100–200mm.
Tungod niini, nagpahimangno ang PHIVOLCS nga posibleng mahitabo ang lahar flow ug mga volcanic sediments sa mga suba ug agi-anan sa tubig nga naglibot sa Bulkang Mayon.
Gipahimangnoan sa ahensya ang mga komunidad sa Albay nga magdoble pag-amping ug mag-andam alang sa posibleng mga katalagman ilabina nga gila-uman na ang kusog nga pag-ulan ug ang syn-eruption lahars sa mga nag-unang kanal nga nag-awas gikan sa habagatan padulong sa sidlakang bahin sa bulkan tungod sa bag-ong mga deposito sa pyroclastic density current (PDC) gikan sa kasamtangang pag-alboroto sa Mayon.
Lakip sa mga lugar nga posibleng maapektuhan mao ang Mi-isi, Bonga ug Basud Gullies, nga mahimong magpagawas og init nga lahar sa Mi-isi ug Binaan Channels sa Daraga; Mabinit, Bonga, Matanag, Buyuan ug Padang sa Legazpi City; ug Lidong ug Basud Rivers sa Sto. Domingo kansa mao unya’y hinungdan sa grabe nga paso ug peligro sa kinabuhi.
Samtang ang mga karaang deposito gikan sa mi-aging mga pagbuto sa kasadpang bahin sa bulkan mahimo usab nga mulihok og utro isip non-eruption lahars ilabina sa Masarawag, Maninila ug mga kaubanang kanal sa Guinobatan.
Ang mga lahar gikan sa Mayon mahimong maghulga og pagbaha, pagdahili sa yuta, pagtabon sa mga panimalay, ug pagdagayday sa mga dagkong bato nga mahimong moabot hangtod sa dagat.
