BUTUAN CITY – Alarming ang pagpangita pa sa International Criminal Court kon ICC og dugang nga mga saksi kalabot sa reklamo batok kang kanhi Pangulong Rodrigo Roa Duterte.
Sumala sa legal expert nga si Atty. Vince Orly Montalban, maka-alarma ang maong kalihukan bisan pa nga dili kini direktang paglapas sa mga lagda ug proseso sa ICC tungod kay anaa pa kini sa pre-trial chamber.
Sa kasamtangan, nagpadayon pa ang pagtigom sa impormasyon ug ebidensya alang sa kaso.
Gani gikwestyon usab ni Montalban ang kalig-on sa kaso batok sa kanhi presidente, diin kung lig-on matud pa ang ebidensya, dili na kinahanglanon ang pag-apela ug pagpangita og dugang nga mga saksi.
Gipadayag pa niini, nga sa Pilipinas, kinahanglang adunay prima facie (fa-si) evidence uban sa reasonable certainty of conviction aron mapadayon ang kaso.
Tungod niini klaro nga adunay kahuyang sa ebidensya kansa gisang-at sa ICC ug kini makahatag og pangutana sa kusog ug direksyon sa kaso batok kang Duterte.
Samtang alang usab kang Atty. Luke Espirito, Presidente sa Bukluran ng Manggagawang Pilipino, normal lang ang padayong pagpangita sa International Criminal Court kon ICC og dugang nga mga witnesses kalabot sa kaso batok kang kanhi Pangulong Rodrigo Roa Duterte ilabina sa ubang nasud diin ang mga investigative offices mangayo og impormasyon gikan sa publiko.
Gipasabot usab niini, nga sukwahi sa Pilipinas, diin bisan adunay gi-ingon nga police patola techniques dili gihapon matud pa seryoso ang proseso sa imbestigasyon tungod kay kasagari, ang mga police patola techniques migamit lang sa mga law enforcement agencies aron makakuha og confession ug affidavit.
Gidugang pa sa abogado, sa ubang nasud seryoso ang ilang pagpangita og ebidensya pinaagi sa pagkuha gikan sa pinakalapad nga tinubdan, ug inanay nga gibuwag ang tinuod ug importante nga impormasyon gikan sa mga walay bili o sayop.
