BUTUAN CITY- Nakab-ot sa lokal nga pangagamhanan sa Tago, Surigao del Sur ang PRIME-HRM Bronze Award gikan sa Civil Service Commission kon CSC, human sa malampusong pagpatuman sa Maturity Level II sa Program to Institutionalize Meritocracy and Excellence in Human Resource Management.
Ang kalampusan gipangulohan sa Intensive Technical Assistance Program kon ITAP nga gi-fasilitate ni Ms. Marilyn Yballa isip kabahin sa iyang Australia Awards Scholarship ug gi-institutionalize pinaagi sa Memorandum of Understanding nga gipirmahan kaniadtong Abril 20, 2023.
Ang ITAP naglakip sa hugot nga proseso sa diagnostic assessment, gap identification, coaching and mentoring, ug pagpalig-on sa dokumentasyon kansa naghatag ug klaro nga agianan padulong sa mas lig-on nga human resource system.
Gawas pa niini, ang programa nakapalig-on sa papel sa mga line managers isip kauban sa pagpanguna sa reporma ug nagpatin-aw, nga ang human resource management usa ka shared leadership responsibility.
Ang maong pasidungog nagpakita sa padayon nga paningkamot sa LGU-Tago sa pagpalambo sa institusyon, pagpalig-on sa kalig-on sa organisasyon, ug paghatag ug mas episyente nga serbisyo publiko alang sa katawhan.
