BUTUAN CITY – Gikondena sa lokal nga kagamhanan sa lungsod sa Carmen, Surigao Del Sur ang pagkutay sa ilang lungsod sa usa ka post sa social media nga naglambigit sa mayor sa nakumpiskang halos 400-milyones pisos nga kantidad sa shabu sa Liloan Ferry Terminal, Brgy. San Roque, Liloan, Southern Leyte sa nakalabay nga semana.
Sa gipagawas nga written statement ni Mayor Jane Plaza, wala matud pa’y basehan ang akusasyon diha sa social media dayung pasabot nga si Catherine Arienza, ang Human Resource Designate sa LGU-Carmen, mao ang kanhi tag-iya sa Mitsubishi Montero diin didto nakuha ang binultong shabu.
Nalambigit matud pa sa vehicular accident ang maong sakyanan nga bulantaryong gi-uli ngadto sa bangko ug car dealer niadtong Setyembre 7, 2023 rason nga wala nay kalabutan si Arienza sa bisan unsang kalambigitan sa maong sakyanan.
Mapamatud-an matud pa kini sa deed of sale sa sakyanan tali sa nagbaligya niini nga si Stephanie Rey Barretto sa Bajada, Buhangin, Davao City ug sa nagpalit nga si Benzar Mamalinta, residente sa E. Rodriguez Sr. Ave., sa Quezon City, niadtong Nobyembre 6, ning tuiga lang.
Gikumpirma ni Nonoc Plaza, tigpamaba sa Agusan Del Sur provincial government, nga ang mayor sa Carmen, Surigao del Sur, asawa ni Loreto, Agusan del Sur Vice-Mayor Randolph Plaza.
Tungod niini, labaw nga walay kamatooran ang alegasyong gipanag-iya o involve si Mayor Jane ug si Vice Mayor Randolph sa ilegal nga kontrabando. Gawas niini, makita usab nga ang driver’s license ni Mamalinta, maoy natumbok usab nga tag-iya sa sakyanan.
Pagtoo pa ni Plaza, pulitika gihapon ang motibo sa pagpakaylap sa maong pekeng balita.
