BUTUAN CITY- All set na ang Cabadbaran City Local Government Unit kon LGU sa pagtubag sa tanang panginahanglanon sa 31 ka barangay sa syudad ilabi na sa epekto sa daot nga panahon nga dala ni Bagyong Basyang, kansa nagbutang sa Caraga Region ubos sa Tropical Cyclone Wind Signal No. 2.
Sumala Roselyn Gangca Exaure, tigpamaba sa LGU Cabadbaran, naka-preposition na ang mga relief goods ug gisunod ang guidelines sa Department of Social Welfare and Development kon DSWD nga ang barangay mismo ang unang mo-augment sa mga namakwit sa ilang lugar.
Bisan wala pa makalanding ang bagyo, gi-activate na ang Emergency Operation Center, gani gibutyag usab niini nga aduna nay natala nga pagbakwit sa pipila ka barangay sa maong syudad. Sa 31 ka barangay, unom na ang adunay evacuees lakip na ang Barangay La Union nga adunay 45 ka pamilya kon 185 ka indibidwal, Barangay Concepcion nga adunay tulo ka evacuation centers nga nag-akomodar sa 63 ka pamilya, ug Barangay Mahaba nga adunay 188 ka pamilya sa duha ka evacuation sites.
Adunay natala usab sa Barangay Mabini diin adunay 2 ka pamilya nga nanghikling, ingon man sa Barangay Puting Bato nga adunay 1 ka pamilya, ug Calibunan 3 ka pamilya.
Sigon ni Exaure, sa kasamtangan adunay 85 ka identified evacuation centers sa Cabadbaran City nga giandam sa posibleng pagdagsa sa mas daghang evacuees samtang nagpadayon ang ulan ug kusog nga hangin nga dala ni Bagyong Basyang.
