BUTUAN CITY – Pormal nang ilusad sa Land Transportation, Franchising and Regulatory Board kon LTFRB-Caraga karong Sabado ang 13 ka mga latest model nga taksi dinhi sa dakbayan sa Butuan nga gibansagang ‘Balangay Taxi sa Butuan’.
Ka-abag sa maong ahensya ang unang transportation organization nga TRANSCO paglusad niini isip unang kahugpungang mi-avail sa 50 gikan sa usa ka gatus ka mga yunit nga gi-grant sa LTFRB Central Office.
Sa eksklusibong pakighinabi sa Bombo Radyo Butuan, gipadayag ni Ian Primero – Technical Division Chief sa LTFRB-Caraga nga ang laing 50 alang niadtong kooperatiba o kaha korporasyon nga mu-avail niini.
Nasayrang gikan dinhi sa Butuan, mamahimong mubiyahe gilayon ang nasangpit nga mga yunit sa bisan asang parte sa Caraga Region.
Gidugang pa sa opisyal nga tungod kay latest og moderno ang mga taksi, hitsas na kini sa moderno usab nga kagamitan sama sa pagbaton niini og Global Positioning System kon GPS aron matud-an ang yunit higayong mawala kini.
Kompleto usab kini sa uban pang mga security og safety features sama sa CCTV og dash camera samtang naka-uniporme ang mga drivers nga sweldado sa kooperatiba.
