BUTUAN CITY – Hugot nga gidepensahan sa Butuan City Assessor’s Office ang reklamo sa mga negosyante sa kalangay pag-release sa bag-o nilang mga tax declarations taliwa nga niadto pang Disyembre ning mi-aging tuig 2020 nila kini gipasa.
Sa eksklusibong pakighinabi sa Bombo Radyo Butuan, gibutyag ni Janet Dilag, hepe sa City Assessor’s Office nga ang ilang regular assessment calendar, magsugod gyod sa buwan sa Enero ug ang pagsugod na sa validation ug pag-reproduce sa tax declaration himuon sa Hunyo nga matapos sa Septembre ug ning buwana, dapat mapagawas na ang mga tax declaration.
Apan wala na kini masunod human nga ang ilang gidusong ordinansa nga nagpasaka sa realty tax, na-aprubahan ning mi-agi pa lang buwan sa Disyembre rason nga niadto pang Disyembre 16 tuig 2020 sila nakasugod sa ilang validation sa records samtang sa Disyembre 21 na sila nakasugod pagpang-release sa mga tax decs.
Kini ang hinungdan nga wala makabayad ang mga negosyante sa ilang buhatan ilabina kadtong wala pa ma-isyuhi og bag-ong tax declaration.
Padayon matud pa ang ilang paningkamot nga mapagawas gilayon ang gikinahangang tax decs sa mga negosyante apan ang kakulang nila sa mga sakop ang hinungdan nga dili na nila ma-ato ang pag-isyu niini base sa na-andan nang eskedyol tungod kay gikan sa 40 ka mga kompletong pwersa sa katapusan nilang general revision niadtong 2018, karon 18 na lang sila.
Niadto matud pang 2018, kapin lang sa 78-mil ka mga tax decs ang ilang rebisahon kansa mas gamay lang kung ikumpara sa kapin 120-mil nga maoy trabahuon karon sa 18 lang nila ka mga sakop.
Aminado ang opisyal nga matag-Disyembre, daghang mga negosyante ang mudalikyat sa ilang buhatan aron maka-avail og discount sa bayran nilang buhis apan tungod sa nalangay nga pag-apruba sa city resolution, rason nga nagtapun-og karon ang ilang trabahuon nga lisod na nilang ma-apas bisan pa man sa pag-overtime nila sa ilang mga trabaho.
