BUTUAN CITY – Subling nabalhog sa bilanggoan kining 22-anyos nga lalaki human kini nakuhaan og 5.4 milyones nga kantidad sa shabu lakip na armas sa gikasang buy-bust operation kaganinang ala1:30 ang takna sa buntag sa may Purok 2A, Barangay Bading, Butuan City.
Nailhan ang suspek nga si Alyas Jerome, dunay kapuyo kansa gikonsiderang High Value Individual drug personality nga residente sa P4 Balantiyong, Maon, Butuan City og nasutang sa miaging buwan pa kini nakagawas sa prisuhan tungod sa pagtiner og ilegal nga armas.
Sa gikasang buy-bust operation sa mga ginsakpan sa City Drug Enforcement Unit sa Butuan City Police Office kauban ang Butuan City Police Station-2, malampusong napalitan ang suspek sa kapulisan nga nagsilbing poser buyer.
Nakuha gikan sa posisyon sa suspek ang 10 ka binulto nga sachet nga dunay sulod sa gitoohang shabu nga mikantidad sa gibana-banang mitimbang og 800 gramos og mikantidad sa 5-milyones 440-mil pesos.
Lakip usab sa nakuha ang kalibre punto 45 nga pistola uban ang mga buhing bala apil na ang 50-mil pesos nga buybust money.
Nasayrang dugay na namonitor sa kapulisan ang pagpamaligya sa suspetsado sa ginadiling drogas hangtud kini maaresto.
Sa karun gikustodiya na kini sa Butuan City Police Station-2 alang sa tukmang disposasyon samtang atubangon ang kasong may kalapasan sa RA 9165 o Comprehensive Dangerous Drugs Act of 2002 ug RA 10591 o illegal Fire arms & Ammunition Act.
