BUTUAN CITY – Gi-andam na sa kapulisan sa Gingoog City sa Misamis Oriental ang kasong murder nga ilang ipasaka batuk sa usa ka wanted nga trisicad driver kinsa nadakpan sa laing kaso og mi-angkong napatay ang iyang ka-ipon duha ka tuig na ang nakalabay.
Sigon ni P/Sr. Insp. Jayward Dolatre – OIC chief sa Butuan City Police Station 2, regular filing matud pa ang himuon sa kasong murder nga ipasaka batuk kang Tirso Cachapero, 47-anyos, lumad nga taga-Guindulman, Bohol og kasamtangang nagpuyo sa Purok 8, Brgy. Doongan ning siyudad sa Butuan kinsa nag-atubang og kasong paglapas sa Republic Act 7610 didto sa Bohol.
Mahinumdumang na-shock ang mga sakop sa Butuan City Police Station 2 dihang gi-angkon sa nadakpan nilang wanted person nga iyang napatay ang iyang ka-ipong si Janet Gaudicos, 26-anyos didto sa Purok 1-B, Brgy. Gibyuan, Gingoog City sa Misamis Oriental niadtong alas-dos sa hapon sa Hunyo 12, 2016.
Gihimo matud pa sa suspek ang pagtuok sa iyang ka-ipon hangtod nga namatay tungod sa pagbahad niining biyaan siya og ubanon ang ilang tulo ka mga anak.
Tungod sa detalyadong pagsaysay sa suspek, ilang nakabot ang gilubngan sa biktima kondiin narekober nila pasado alas-kwatro kagahapon sa hapon ang kalabera niini.
Gikatakdang i-turn over sa kapulisan ang suspek ngadto sa korte sa Bohol nga maoy nag-isyu og arrest warrant batuk kaniya.
Hulaton na lamang sa kapulisan sa Gingoog City ang pakig-alayon sa mga kabanay sa biktima nga taga-Loon, Bohol higayong maka-abot na kanila ang maong balita. (Beth Ruiz)
