BUTUAN CITY – Pakisayran pa sa kapulisan kung tinood ba ang saysay usa ka pulis nga misurender human matud pa niya mapulisan ang hubog nga nag-wild sa ilang lugar kaganinang buntag sa Purok Pag-asa, Barangay Pagatpatan ning siyudad sa Butuan.
Sigon ni Police Sr. Insp. Randy Azote, Hepe sa Butuan City Police Station-2, gikan sa duty ang pulis nga si PO2 Ariel Tale, sa Butuan City Mobile Force nga mipauli sa ilang panimalay sa dihang dunay nagkagubot gawas sa balay.
Nakita matud pa niini ang suspek nga Hubog nga si Helbert Magallo, 23-anyos, olitawo nga taga Purok-14 sa maong barangay nga dunay dalang kutsilyo ug gitook niini ang lector sa simbahan nga si Lolita Curilan.
Gisulayan ni PO2 Tale ug pakalma ang suspek apan gi-atake na hinoon siya gamit ang kutsilyo ug gilabay pa siya ug bato nga mi-igo sa iyang dughan.
Nagpaila pa ang pulis apan nagpadayon pa gihapon sa pag-atake ang hubog gamit ang kutsilyo hinungdang napugos kini sa pagpulis gamit ang serviced firearms nga 9mm nga mi-igo sa ubos sa dughan sa hubog.
Daling gidala sa pulis ngadto sa usa ka pribadong ospital ang napusilan nga hubog nga nag-wild pa sulod sa sakyanan.
Human naplastar sa balay tambalanan, daling mitahan sapolice station si PO2 Tale nga kasamtangan karung gi-imbestigahan.
Sa kasamtangan, anaa na sa luwas nga kahimtang ang napusilan nga hubog samtang planong pasakahan sa nakapusil nga pulis.
