BUTUAN CITY – Human mag-selfie sulod sa kampo sa kapulisan sa General Santos City samtang nagsul-ob og uniporme nga susama sa usa ka pulis, mahimo nang magpakuha og hulagway sulod sa prisohan ang usa ka lalaki, pinaagi sa mugshot, tungod sa pagkasikop niini.
Sumala sa report sa mga kapulisan nga mismong sulod sa General Santos City Police Office (GSCPO) nadakpan ang 24-anyos nga lalaki samtang nagsul-ob kini og uniporme sa pulis. Nag-selfie matud pa ang lalaki tupad sa SAF-44 nga estatuwa nga nahimutang sa parking area sulod sa kampo niadtong Lunes.
Apan sa pagsukit-sukit, nasuta sa mga kapulisan nga dili diay kini tinood nga pulis ug nagpaka-arun ingnon lamang, rason nga gidakop gilayon kini. Sumala ni General Santos City Police Office Director, Police Colonel Nicomedes Olaivar Jr., nga gipahimuslan sa maong lalaki ang pagsulod sa mga tawo nga modangop sa kapolisan.
Sumala usab sa suspek nga napalit lamang ang uniporme sa police online. Mag-atubang og daghang kaso ang maong lalaki, lakip na ang usurpation of authority ug illegal use of police uniform.
