BUTUAN CITY – Nahimong hisgutanan karun sa social media ang nahitabo sa dakbayan sa Cebu diin tulo ka maanyag nga babaye ang gisumbag og tuyo sa usa ka lalaki sa managlahing dapit.
Subay sa imbestigasyon, gibutyag sa dinakpan nga suspek ang tinuod nga rason sa iyang gibuhat.
Niadtong Hunyo 9, Domingo sa gabii, tulo ka babaye nga sila si Mary Claire, Irvette ug Erica, ang sunodsunod nga gipanumbag sa suspek nga si “Albert.”
Pasado alas 6:00 sa gabii samtang naglakaw si Mary Claire dihang nasugatan niya sa dalan ang suspek ug kalit lang kining giitsahan ug kinumo nga miresulta sa pagdugo sa ibabaw nga bahin sa iyang ilong.
Sa pikas bahin, padung na pud unta mopauli si Irvette mga alas 7:00 sa gabii dihang kalit usab siyang gisumbag sa suspek nga iyang gikasugat hinungdan nga nakahiagom ug “blackeye”.
Samtang nakuha sa camera ang nahotabo sa ikatulong biktima nga si Erica dihang nasugatan usab niini si Albert sa kilid sa sidewalk ug kalit nga gisiko kini ug naigo sa agtang.
Ang suspek nadakpan sa mga tawo ug gikulata una pa gidala sa presinto.
Sulod sa prisohan, gisaysay ni Albert ang iyang istorya diin matud niini gikulata usab sya gawas sa usa ka computer shop.
Matod niya nga samtang nagdula siya sa computer shop adunay bata nga iyang tupad ang nagpabuyag kaniya maong iya kining gibadlong.
Apan sa dihang wala mohunong ang bata, iya kining gitukmod.
Gikaingong didto na siya gikasab-an sa tag-iya sa computer shop ug nidagan kini pagawas.
Apan sa gawas, unom ka lalaki ang giingong nibabag kaniya ug gikulata.
Maong sa iyang kalagot sa panghitabo wa kini maghilom hangtud nga makabalos.
Iyang gihisgutan isip balos ang pagpanumbag sa maanyag nga mga babaye.
Sumala pa niini, huyang ang mga babaye, dili kaayo agresibo, mao nga didto nipagawas sa iyang kalagot.
Wala matud pa usab kapuslanan kung sa mga dili hitsuraan niya kini buhaton.
Usa sa biktima ang niinsisti nga walay katungod ang bisan si kinsa nga mangulata sa susama lamang nga rason.
Napasakaan na ug kaso ang suspek.
