BUTUAN CITY – Bisan og dili tinuyuan sa usa truck driver ang pagbangga sa usa ka motorista sa gimanehuan niyang 10-wheeler truck nga duna’y largang veneer kagabii, kasuhan gihapon siya sa kapulisan sa Cabadbaran City human namatay ang maong biktima.
Sigon ni Police Major Rennel Serrano – hepe sa Cabadbaran City Police Station, pareho og direksyon ang duha ka mga sakyanan kondiin pag-abot sa trak sa check point sa may Purok 6-B, Brgy. La Union sa maong siyudad pasado alas10:30 kagabii, gipahunong kini alang sa inspeksyon.
Gidala gilayon kini sa Cabadbaran Emergency Hospital apan gideklarang dead on arrival.
Migawas pa sa ilang inisyal nga imbestigasyon nga naka-inom matud pa ang biktimang wala naka-helmet og pauli na unta samtang padulong usab sa maong lungsod ang trak aron maghatud og supply sa veneer.
Naila ang biktimang si Dave Ocho, residente sa Purok 1-A, Brgy. Caloc-an, lungsod sa Magallanes, Agusan del Norte samtang ang driver sa trak naila usab nga si Jonjie Derencia, 29-anyos, residente sa Purok 10, Brgy. Del Monte, Talacogon, Agusan del Sur.
Igo lang nakanaog ang driver dihang duna’y mipaka sa likod nga bahin sa trak og didto na nakita nga maayong pagkapasok sa biktima og sa gimanehuan niining motorsiklo rason nga kinahanglan pang pa-abantihon ang trak aron lang makuha ang biktima.
Dugang ni Serrano, wala sila’y nakitang kalapasan sa panig sa truck driver tungod kay gawas nga nakasunod kaniya ang motorsiklong gimanehuan sa biktima, naka-hazard pa ang suga sa likod nga bahin sa iyang trak.
