BUTUAN CITY – Gitu-uhang ang pagkalumos ang hinungdan sa pagkamatay sa usa ka lalaki human kini napalgang naglutaw na sa Agusan River kagabii.
Naila ang biktimang si Mario Ebdana, 57-anyos, minyo og residente sa Purok 1, Brgy. Fort Poyohon ning siyudad sa Butuan.
Ang pump boat driver nga si Ricardo Duncano, 51-anyos, minyo og residente sa Purok 8, Brgy. Pagatpatan ning siyudad ang nakakita sa patay’ng lawas sa biktima nga naglutaw na sa Agusan River.
Migawas sa inisyal nga imbestigasyon nga niadtong Sabado pa katapusang nakita ang biktima kinsa padulong sa Agusan River aron manguha og mga anod nga kahoy apan wala na maka-uli pa.
Napalgan ang patay’ng lawas sa biktima pasado alas-sais kagabii didto sa Purok 7, Pag-asa, Brgy. Pagatpatan ning siyudad. (Beth Ruiz)
