BUTUAN CITY – Padayon pang gipangita ang usa ka aktibong membro sa Civilian Active Auxiliary kon CAA kinsa daling misibat human gipusil ang iyang silingan tungod lang sa bangi sa gitanom nga falcatta nga misangpot sa kamatayon niini kagahapong adlawa didto sa Esperanza, Agusan del Sur.
Sigon ni PCaptain Zaldy Maestre, ang officer-in-charge sa Esperanza Municipal Police Station, daling misibat si Joker Mamba-unga alyas Joker, 27-anyos kinsa nadestino sa 26th Infantry Battalion, Philippine Army human niini gipusil sa maka-usa lang ka higayon si Guillermo Capistrano, 59-anyos kinsa na-igo sa iyang wala nga bukton.
Nakadawat matud pa sila og tawag gikan kang Kagawad Emelito Mondejar Lingato pasado alas-dose na sa udto kalabot sa maong hitabo nga natigayon alas-9:30 sa mi-aging buntag.
Didto na sila mideretso sa Esperanza Medicare Community Hospital tungod kay didto na man gidala ang biktima ug gibalhin sa ospital sa Tagum City diin didto na kini nakabsan sa iyang kinabuhi kagahapon sa hapon.
Sa ilang inisyal nga imbestigasyon, nagkalalis matud pa ang duha sa duha ka punuan sa Falcatta nga pareho nilang gi-angkong sila ang nagtanom kansa nasulod sa yuta sa biktima hinungdan sa maong hitabo.
