BUTUAN CITY – Gipasakaan na og kasong frustrated homicide ang usa ka construction worker human niini gibunalan og hatsa ingon man pala ang iyang ka-inom nga higala ning mi-aging alas-dos sa kaadlawon.
Anaa na sa luwas nga kahimtang ang biktimang si Richie Navarro Estrella, 32-anyos, minyo og residente sa Sitio Fatima, Brgy. San Jose, lungsod sa Sta. Josefa, Agusan del Sur human gibirahan ni Edgar Sanggare Jr., 21-anyos, residente sa Purok 11, Brgy. Poblacion sa susamang lungsod.
Sigon ni PCaptain Ernesto Marcos – hepe sa Sta Josefa Municipal Police Station, migawas sa ilang imbestigasyon nga uban nga nag-inom ang duha sa payag nga gipuy-an sa suspek og dihang nahurot na ang ilang gitagay, mibiya una si Sanggare aron magpalit og sigarilyo.
Dako na lang ang iyang kakurat dihang sa iyang pagbalik, nakita na lang matud pa niya si Estrella nga mikamang sulod sa moskitero diin natulog na ang ka-ipon sa suspek nga nagpatutoy sa ilang anak.
Dinhi na siya mikuha og hatsa nga gibunal sa ulo ni Estrella ug gisundan pa sa pagbunal pa niya niini og pala hangtud nga nabaraw siya sa mga silingan.
Daling gidala sa ospital ang biktima kinsa anaa na karon sa luwas nga kahimtang.
