BUTUAN CITY- Gipangulohan ni Leyte Rep. Ferdinand Martin Romualdez, presidente sa Lakas-CMD, ang pagpresentar sa House Bill 8191 kiansa naghatag og 50% discount sa kuryente alang sa mga pamilya nga adunay minimum wage earner sa ilang pangunahing puy-anan. Lakip usab sa sugyot ang automatic lifeline enrollment alang sa mga marginalized ug vulnerable nga konsyumer.
Sumala ni Romualdez, kabahin kini nga bill sa GINHAWA KIT – Kuryente, Internet, Trabaho diin nagtinguha nga maminusan ang kabug-at sa nagkataas nga gasto sa panginabuhi.
Gipasiugda ni Rep. Romualdez nga obligasyon sa mga magbabalaod ang paghatag og konkretong tabang, ug usa sa pinakasayon nga paagi mao ang pagpamenos sa gasto sa kuryente pinaagi sa balaod.
Matod ni Deputy Speaker David “Jay-Jay” Suarez, ang 50% discount alang ara sa mga balay nga adunay bisan usa ka minimum wage earner ug kini susihon ug ire-revalidate aron masiguro nga husto ug lehitimo ang benepisyo.
Alang kang Deputy Speaker Jay Khonghun, ang diskwento makatabang sa mga pamilya tungod kay ang kuryente usa ka nag-unang panginahanglan nga adunay kalabutan sa kahimsog, edukasyon, kaluwasan, ug panginabuhi.
Lakip usab sa maong sugyot ang 100% nga discount sa lifeline rate alang sa mga panimalay nga mokonsumo og hangtod 50 kWh matag bulan, sumala ni Deputy Speaker Paolo Ortega.
Tumong usab sa bill nga mapadali ang enrollment sa mga benepisyaryo, labi na sa mga pamilya nga anaa sa lagyo nga dapit, sumala ni Rep. Zia Alonto Adiong.
Sumala ni Dep. Speaker Janette Garin, kabahin ang panukala sa GINHAWA KIT legislative package nga nakatutok sa pagpamenos sa gasto sa kuryente, internet, ug trabaho.
Nalakip usab sa bill ang mga mekanismo aron maprotektahan ang programa batok sa pang-abuso, lakip ang one-household, one-account rule, verification standards, ug periodic revalidation.
Gisugyot usab sa panukala ang pagtukod og inter-agency monitoring ug oversight committee nga pangulohan sa DSWD, uban ang ERC ug DOE isip co-chairperson, aron subayon ang implementasyon, masiguro ang husto nga benepisyo, ug malikayan ang leakages, subay sa Data Privacy Act.
