BUTUAN CITY – Padayon ang imbestigasyon sa kapulisan sa Bayugan City, lalawigan sa Agusan del Sur aron matumbok ang responsable ug ang motibo sa pagpamusil-patay nga natigayon kaganinang alas-8:40 sa buntag sa Purok 9, Andanan, Brgy. Noli sa maong siyudad.
Naila ang biktimang si Brigedo Sacro ramos, 74-anyos, ulitawo, usa ka mag-uuma ug residente sa Purok 6, Brgy. Sta. Irene sakop sa maong siyudad.
Migawas sa inisyal nga imbestigasyon sa kapulisan nga samtang nagmaneho sa iyang gisakyang motorsiklo ang biktima, kalit lang kining gipusil sa pipila ka higayon diha sa iyang lawas resulta sa iyang hinanaling kamatayon.
Kini nahitabo human ang unang pagpamusil-patay usab kagahapon sa buntag tungod mismo sa Bayugan Central Elementary School nga gikamatay sa biktimang si Tata Lismonero, hingkod ang pangidaron ug residente sa susamang dapit kinsa kanhi matud pa disbursement officer sa Bayugan City Hall.
