BUTUAN CITY – Naluwas sa Philippine Coast Guard kon PCG-Siargao Island ang usa ka mananagat human usab mitiklaob ang iyang pumpboat tungod sa dagko nga mga balod sa nakalabay nga adlaw diha sa kadagatan sa Rock Island, General Luna, Surigao del Norte.
Daling mi-arangkada ang Philippine Coastguard Search and Rescue (SAR) Team nga gilangkuban sa Coast Guard Sub-Station General Luna og Coast Guard Special Operations Group – Siargao human nakita ang motorbanca nga mitiklaob nga giguyod ngadto sa baybayon sa Brgy. Cabitoonan, General Luna, Surigao del Norte.
Naila ang naluwas nga si Elvin Escaret, 32-anyos og residente sa Brgy. Cabitoonan, General Luna, Surigao del Norte.
Sumala pa sa maong mananagat, nga mibiya ang gisakyan niining Mbca Nemo sa maong lugar sakay ang 3 ka indibidwal nga hilig mag-surfing og padulong ngadto sa lugar diin sila mag-surfing.
Sa dihang naka-abot sa lugar, mikanaog ang mga surfer og gipaabot ang ilang pagbalik ngadto sa maong bangka sa dihang gihapak kini sa mga dagkong balud hinungdan sa pagkaguba og pagkalunod sa maong bangka.
Tungod niini, gi-awhag sa Station Commander sa Coast Guard Station Siargao nga si Ensign Roy Christopher R Orillaneda ang mga boat operators nga mahimong vigilante ilabina sa lakat sa panahon.
