BUTUAN CITY – Mubiya na karong adlawa sa Manila Port ang nahabiling mga locally stranded individuals kon LSIs aron mupa-uli na sa bisan asang bahin sa Caraga Region human ang pila ka buwang pagkatanggong sa kauluhan dihang na-abtan sa lockdown nga hatud sa COVID-19.
Pasakyon sila sa barko sa 2Go nga maoy gikomisyon sa mga concerned government agencies ug mga opisyal aron ma-facilitate ang ilang pagpa-uli pagpanguna sa Philippine Economic Zone Authority kon PEZA ni director general Charito ‘Ching’ Plaza.
Kagahapon, nagtapok na sa Rizal Stadium ang mga taga-Mindanao nga mga LSIs apil na ang mga taga-Caraga Region alang sa registration, paghikay sa ilang travel pass ug pagpa-ilalom sa rapid test.
Gihatagan usab sila og allowance gikan sa Department of Social Welfare and Development kon DSWD ug ubang tabang ubos sa Hatid Tulong Program ni Pangulong Rodrigo Duterte.
Pag-abot sa lungsod sa Nasipit, sugaton gilayon sila sa mga sakyanang gikomisyon sa mga opisyal sa lalawigan nga ilang uli-an.
Madumdumang kagahapon, mi-abot sa 52 ka mga Returning Overseas Filipino Workers kon ROFs ang mitugpa sa buntag sa Bancasi airport via PAL sweeper flight.
Nagsumikad ang maong ihap sa mga ROFs sa Butuan City ug Surigao del Sur nga dunay tag-12, Surigao del Norte-11, walo sa Agusan del Norte, unom sa Dinagat Islands ug 3 sa Agusan del Sur.
