BUTUAN CITY – Kinse ka mga bloke na usab sa floating cocaine ang nadugang karon sa listahan sa Police Regional Office-13 sa mga na-turn over human nabangalan sa mga mangingisda sa Dinagat Islands sa lalawigan sa Surigao del Norte ning mi-aging adlaw.
Unang narekober ang 8 ka bloke sa cocaine duol sa light house didto sa Sitio Dahican, Brgy. Helen, Gibosong Islands, lungsod sa Loreto, Dinagat Islands, Surigao del Norte pasado alas 5:00 sa hapon sa grupo ni Jouie Cabantoc.
Dali niya kining gi-turn over kang Brgy Kagawad Ramil Marquito nga mao usa’y nagpaabot niini ngadto sa Dinagat Islands Provincial Mobile Force.
Paglabay sa 40-minutos, laing pito ka bloke sa floating cocaine usab ang narekober sa mga mananagat nga naglutaw-lutaw sa baybayon.
Napalgan kini nila Clyde Cabe, 36-anyos; Benito Cabantoc, 16-anyos; Clark Cabe, 36-anyos; ug Joselito Balbuena.
Ang narekober nga butang ang gi-turned-over sa Regional Crime Laboratory Office 13 ug nagpositibong ‘cocaine’ nga mitimbang og 9,805 gramos nga dunay market value nga 51-milyones 966-mil 500 pesos.
Mahinumduman niadtong Pebrero 12, unang napalgan sa kadagatan sa Cagdianao, Dinagat Islands, ang 37 ka bricks sa cocaine nga mitimbang og 48.825 kilos kansa nagkantidad og 244.1 milyones pesos; niadtong Pebrero 14 ngadto sa 15, usab ang 40 ka bloke didto sa kadagatan sa San Isidro, Surigao del Norte, nga mikantidad og 212-milyones pesos; Pebrero 24, sa Tandag, Surigao del Sur diin 34 ka bricks sa cocaine nga mitimbang og 43.62 kilos nga dunay market value nga 231-milyones pesos; og niadtong Abril 7 sa Burgos, Surigao del Norte diin 40 ka bricks ang nakit-an nga mitimbang og 48.575 kilos og nagkantidad og 257.4-milyones pesos.
Sa katibuk-an, nakakolekta ang PRO-13 og 160 bricks
sa cocaine nga mitimbang og 190.825 kilos nga dunay market value nga 946.4 Milyones
pesos.
