BUTUAN CITY – Malampusong nakasurender ang tulo ka mga miyembro sa kumunistang teroristang grupo ngadto sa Chairman City Task Force to End Local Communist Armed Conflict kon CTF-ELCAC sa Cabadbaran City og 29th Infantry “Matatag” Battalion kauban ang 65th Infantry “Stalwart” Battalion kagahapong adlawa.
Naila ang mga mitahan nga sila Ian Sabsalon Acita, olitawo, 28-anyos og residente sa Purok 5 Doña Maxima, San Luis, Agusan del Norte; Rubilyn Gaan Antong, 26-anyos og ang iyang kapuyo nga si Taton Egom Egbot, 28-anyos, parehong nanimuyo sa Purok 3, Brgy Mahaba, Cabadbaran City, Agusan del Norte, pulos miyembro ang mga niini sa Sandatahang Yunit Propaganda 21C, Guerilla Front 21, North Eastern Mindanao Regional Command (NEMRC).
Bitbit sa ilan pagsurender ang usa ka M14 rifle nga dunay 2 ka magazines og 62 ka buhing bala, usa ka improvised M203 nga dunay 9 ka bala og usa ka unit sa Remmington Shotgun nga dunay 5 ka buhing bala.
Base sa pagsaysay sa misurender nga si Ian Acita, hilabihan kalisud na ang ilang kinabuhi sa kabukiran tungod sa kakulang sa pagkaon.Kanunay matud pa silang estoryahan sa kadagkoan nga patyon sila sa mga sundalo ugaling mosurender. Sa kabahinan ni Rubelyn, misurrender sila sa iyang kapuyo alang sa ilang pamilya labi na kay gagmay pa ang mga anak.
Sa nahimong pamahayag ni Col. Jason M Saldua, Commanding Officer sa 29IB, mapasalamaton kini nga nareyalisar sa mga nagsurender nga walay maayung ikahatag ngadto kanila ang armadong kalihukan. Kini dayung pagpasalig nga ang gobyerno mohatag og assistance lakip na ngadto sa ilang pamilya pinaagi sa Enhanced Comprehensive Local Integration Program kon E-CLIP.
Gihangyu usab niini ang nagsurender nga agnihon ang ilang kaubanan nga anaa pa sa kalihukan nga mobalik na sa sabakan sa balaod aron makatagamtam sa maayong kinabuhi.
